Sabunçuda Milli Qurtuluş Gününə həsr olunmuş tədbir — Video

Ötən gün Sabunçu Rayon İcra Hakimiyyəti və Yeni Azərbaycan Partiyası (YAP) Sabunçu Rayon Təşkilatının birgə təşkilatçılığı ilə 15 iyun - Milli Qurtuluş Gününə həsr olunmuş tədbir keçirildi. “Qafqazinfo” xəbər verir ki, tədbirdə Sabunçu Rayon İcra Hakimiyyətinin başçısı Adil Vəliyev, YAP Sabunçu Rayon Təşkilatının sədri Araz Xudadanov, Milli Məclisin deputatları – Azər Allahverənov və Arzuxan Əlizadə, Rayon İcra Hakimiyyəti başçısının müavinləri, rayonun hüquq-mühafizə orqanlarının rəhbərləri,  şəhid ailələri, qazilər, müharibə iştirakçıları, ərazi partiya təşkilatlarının sədrləri, partiya fəalları və rayon ictimaiyyətinin digər nümayəndələri iştirak ediblər. İlk olaraq tədbir iştirakçıları Ulu Öndər Heydər Əliyevin abidəsi önünə gül dəstələri düzərək əziz xatirəsini dərin ehtiramla yad ediblər. Dövlət himni səsləndirildikdən sonra Ümummilli lider Heydər Əliyevin və ölkəmizin azadlığı uğrunda canlarından keçən şəhidlərimizin əziz xatirəsi birdəqiqəlik sükutla yad edilib. Tədbiri giriş nitqi ilə açan Sabunçu Rayon İcra Hakimiyyətinin başçısı Adil Vəliyev qeyd edib ki, Ulu Öndər Heydər Əliyevin dövlət idarəçiliyindəki prinsipiallığı və vətənpərvər mövqeyi onu uzaqgörən siyasi lider kimi fərqləndirirdi. Onun xalqla birbaşa təması, açıq ünsiyyət qurmaq bacarığı və şəffaf idarəçilik yanaşması cəmiyyətin ona olan inamını daha da möhkəmləndirdi. A.Vəliyev vurğulayıb ki, 1993-cü il iyunun 15-də Heydər Əliyevin Azərbaycan Respublikası Ali Sovetinin sədri seçildiyi gün Azərbaycanın müstəqil dövlət kimi mövcudluğunun və gələcəyə doğru inamla irəliləməsinin başlanğıcı oldu. Daha sonra çıxış edən YAP Sabunçu Rayon Təşkilatının sədri Araz Xudadanov bildirib ki, 15 iyun təkcə təqvimdə qeyd olunan bir tarix deyil, müasir Azərbaycan dövlətinin xilası və yüksəlişinin başlanğıcıdır. Xalqın təkidli tələbi ilə Ulu Öndər Heydər Əliyevin hakimiyyətə qayıdışı ölkənin gələcək taleyini müəyyənləşdirən mühüm hadisəyə çevrildi. Qeyd olundu ki, onun siyasi iradəsi, zəngin dövlətçilik təcrübəsi və uzaqgörən fəaliyyəti nəticəsində ölkədə sabitlik bərpa olundu, dövlət institutları möhkəmləndirildi və inkişaf strategiyasının əsasları formalaşdırıldı. Çıxışlardan sonra bir qrup YAP fəalı YAP Sabunçu Rayon Təşkilatı tərəfindən diplomlarla təltif olunub.15 iyun - Milli Qurtuluş Gününə həsr olunmuş tədbir konsert proqramı ilə davam edib.