Çində zooparkda itləri panda kimi boyadılar

Çinin Qufu şəhərində yerləşən zooparkın əməkdaşları turistlərin marağını çəkmək üçün çau-çau cinsindən olan itləri panda rənglərinə boyayıblar. “Qafqazinfo” xəbər verir ki, bu barədə “Gazeta.ru” məlumat yayıb. Məlumata görə, heyvanlar zooparkın canlı yayımında “panda-it” adı ilə nümayiş etdirilib. Yayım zamanı bəzi izləyicilər pandaların istiyə həssas olduğunu xatırladaraq heyvanlar üçün kondisionerin işlədilib-işlədilmədiyini soruşublar. Bundan sonra yayımın aparıcısı onların əslində çau-çau itləri olduğunu etiraf edib. Zoopark əməkdaşları bildiriblər ki, hazırda onların həqiqi pandaları saxlamaq üçün lazımi icazələri yoxdur. Buna görə də ziyarətçiləri əyləndirmək məqsədilə “panda-itlər” nümayiş etdirilib. Rəhbərlik qeyd edib ki, heyvanların rənglənməsi peşəkar baxım salonunda, heyvanlar üçün təhlükəsiz boyalardan istifadə olunmaqla həyata keçirilib.