Azərbaycan nefti yenidən bahalaşdı

Azərbaycanın Azeri Light markalı neftinin qiyməti yüksəlib. Neft bazarının iştirakçılarının məlumatına görə, İtaliyanın Auqusta limanında Azərbaycan neftinin CIF bazasında qiyməti əvvəlki göstərici ilə müqayisədə 5,22 ABŞ dolları və ya 6,4% artaraq bir barel üçün 86,51 ABŞ dollarına çatıb. Türkiyənin Ceyhan limanında isə Azeri Light markalı neftin FOB bazasında qiyməti 4,79 dollar və ya 6,1% yüksələrək 83,15 ABŞ dolları təşkil edib. Bununla yanaşı, Urals markalı neftin qiyməti də artıb. Belə ki, göstərici 4,74 dollar və ya 10,1% yüksələrək bir barel üçün 51,67 dollara çatıb. Şimal dənizində hasil olunan Dated Brent markalı neftin qiyməti isə 5,24 dollar və ya 6,8% artaraq 82,56 ABŞ dolları olub. Qeyd edək ki, Azərbaycanın 2026-cı il dövlət büdcəsində neftin bir barelinin orta qiyməti 65 ABŞ dolları səviyyəsində nəzərdə tutulub. Müəllif: Malik Məlikov (Milli.Az redaktor)