Əksərinin zibilə atdığı kartof qabığının bilinməyən istifadələri

Çoxlarının istifadə etdikdən sonra zibilə atdığı kartof qabığı evdə və bağda müxtəlif məqsədlər üçün yararlı ola bilər. Milli.Az Medicina.az -a istinadən xəbər verir ki, kartof qabığı tərkibindəki nişasta, minerallar və üzvi maddələr sayəsində həm təbii gübrə hazırlanmasında, həm də ev təmizliyində istifadə oluna bilər. Mütəxəssislərin sözlərinə görə, kartof qabığından istifadənin ən geniş yayılmış üsullarından biri kompost hazırlamaqdır. Digər üzvi tullantılarla birlikdə parçalanan qabıqlar torpağın münbitliyini artıran qida maddələri ilə zəngin komposta çevrilir. Prosesi sürətləndirmək üçün qabıqların xırda doğranması və quru yarpaq və ya karton kimi karbonla zəngin materiallarla qarışdırılması tövsiyə edilir. Kartof qabığı ev təmizliyində də faydalıdır. Tərkibindəki oksalat turşusu sayəsində metal səthlərdə əmələ gələn yüngül pas ləkələrinin təmizlənməsinə kömək edir. Bunun üçün kartof qabığının iç hissəsini paslı səthə sürtmək, daha sonra həmin yeri təmizləyib qurutmaq kifayətdir. Beləliklə, kartof qabığını zibilə atmaq əvəzinə onu həm bağçılıqda, həm də məişətdə faydalı şəkildə dəyərləndirmək mümkündür. Müəllif: Malik Məlikov (Milli.Az redaktor)